Jer 24 | TpiKJPB | STEP | ¶ BIKPELA i soim mi, na, lukim, ol i putim tupela basket fik long ai bilong tempel bilong BIKPELA, bihain long Nebukadresar, king bilong Babilon, i bin karim i go kalabus Jekonaia, pikinini man bilong Jehoiakim, king bilong Juda, na ol hetman bilong Juda, wantaim ol kamda na ol man bilong wokim ain , i lusim Jerusalem, na em i bin bringim ol long Babilon.

Jeremiah 24

1 ¶ BIKPELA i soim mi, na, lukim, ol i putim tupela basket fik long ai bilong tempel bilong BIKPELA, bihain long Nebukadresar, king bilong Babilon, i bin karim i go kalabus Jekonaia, pikinini man bilong Jehoiakim, king bilong Juda, na ol hetman bilong Juda, wantaim ol kamda na ol man bilong wokim ain , i lusim Jerusalem, na em i bin bringim ol long Babilon. 2 Wanpela basket i gat ol fik i gutpela tru, yes, olsem ol fik i mau pastaim. Na arapela basket i gat ol fik i nogut olgeta, dispela ol man i no inap long kaikai, ol i nogut olsem. 3 Nau BIKPELA i tokim mi, Yu lukim wanem samting, Jeremaia? Na mi tok, Ol fik. Ol gutpela fik i gutpela tru, na ol fik nogut i nogut tru, inap long ol man i no inap kaikai ol, ol i nogut olsem. 4 Na gen tok bilong BIKPELA i kam long mi, i spik, 5 BIKPELA, God bilong Isrel, i tok olsem, Wankain olsem ol dispela gutpela fik, olsem tasol bai Mi luksave na tokaut klia long ol husat ol i karim i go kalabus bilong Juda, husat Mi bin salim i go ausait long dispela ples i go long hap bilong ol lain Kaldia, bilong helpim ol. 6 Long wanem, Mi bai putim ol ai bilong Mi antap long ol bilong mekim gut long ol, na Mi bai bringim ol gen long dispela hap. Na Mi bai wokim ol, na Mi no inap pulim ol i kam daun. Na Mi bai planim ol, na Mi no inap kamautim ol i kam antap. 7 Na Mi bai givim ol wanpela bel bilong save long Mi, long Mi stap BIKPELA. Na ol bai stap lain manmeri bilong Mi, na Mi bai stap God bilong ol. Long wanem, ol bai kam bek long Mi wantaim olgeta bel bilong ol. 8 Na olsem ol fik i nogut, dispela ol man i no inap kaikai, ol i nogut olsem, tru tumas, BIKPELA i tok olsem, Olsem tasol bai Mi givim Sedekaia king bilong Juda, na ol hetman bilong em, na lain i stap yet bilong Jerusalem, husat i stap yet long dispela hap, na ol husat i stap long hap bilong Isip, 9 Na Mi bai givim ol long ol i ken rausim ol i go long olgeta kingdom bilong dispela graun bilong bagarap bilong ol, bilong stap wanpela tok bilong sem na wanpela provep, wanpela tok bilong kirapim belhat na wanpela tok nogut, long olgeta ples we Mi bai ranim ol i go long en. 10 Na Mi bai salim bainat, bikpela taim hangre, na sik nogut, namel long ol, inap long taim ol i kaikai ol olgeta i lusim dispela hap Mi givim long ol na long ol tumbuna papa bilong ol.